വിദ്യാഭ്യാസ പ്രോത്സാഹന പദ്ധതികൾ

(a) പ്രത്യേക പ്രോത്സാഹന സമ്മാന പദ്ധതി

വിവിധ പരീക്ഷകൾക്ക് ഉയർന്ന മാർക്ക് വാങ്ങി പാസാകുന്ന പട്ടികജാതി വിദ്യാർത്ഥികൾക്ക് പ്രത്യേക പ്രോത്സാഹനമായി ക്യാഷ് അവാർഡ് നൽകുന്ന പ്രത്യേക പ്രോത്സാഹന സമ്മാന പദ്ധതി ചുവടെ ചേർക്കുന്ന നിരക്കുകൾ പ്രകാരം അനുവദിച്ചു വരുന്നു.

(b)ശ്രീ അയ്യൻകാളി മെമ്മോറിയൽ ടാലന്റ് സെർച്ച് ആന്റ് ഡെവലപ്മെന്റ് സ്കോളർഷിപ്പ് പദ്ധതി

പഠന, പാഠ്യേതര പ്രവർത്തനങ്ങളിൽ തൽപരരായവരും എന്നാൽ കുടുംബപരവും സാമ്പത്തികവുമായ പിന്നാക്കാവസ്ഥ കാരണം മികവ് പ്രകടിപ്പിക്കുവാൻ കഴിയാത്തവരുമായ പട്ടികജാതി വിദ്യാർത്ഥികൾക്ക് പഠനപ്രവർത്തനങ്ങൾ മെച്ചപ്പെടുത്തുന്നതിനാവശ്യമായ സഹായം നൽകുക എന്ന ലക്ഷ്യത്തോടെ ആവിഷ്കരിച്ചു നടപ്പിലാക്കി വരുന്ന പദ്ധതിയാണ് ശ്രീ അയ്യൻകാളി മെമ്മോറിയൽ ടാലന്റ് സെർച്ച് ആന്റ് ഡെവലപ്മെന്റ് സ്കോളർഷിപ്പ് പദ്ധതി. പദ്ധതിയുടെ നിരക്കുകൾ ചുവടെ ചേർക്കുന്നു.

പ്രതിവർഷ വരുമാന പദ്ധതി ഒരു ലക്ഷം രൂപ.

5 to 7-Rs. 5000/-
8 to 10 Rs. 5500/-
(പ്രതിവർഷം)

(c)പഠനയാത്ര 

സംസ്ഥാനത്ത് ഹയർ സെക്കൻഡറി, ബിരുദം, ബിരുദാനന്തര ബിരുദം, പ്രൊഫഷണൽ കോഴ്സുകൾ എന്നിവ ഉള്ള വിദ്യാഭ്യാസ സ്ഥാപനങ്ങൾ സംഘടിപ്പിക്കുന്ന പഠനയാത്രയിൽ പങ്കെടുക്കുന്ന പട്ടികജാതി വിഭാഗം വിദ്യാർത്ഥികൾക്കുള്ള പരമാവധി ചെലവ് 4,000 രൂപയായി നിജപ്പെടുത്തി, സ്ഥാപന മേധാവി സാക്ഷ്യപ്പെടുത്തുന്നത് പ്രകാരം ജില്ലാ പട്ടികജാതി വികസന ഓഫീസിൽ നിന്നും തുക അനുവദിക്കുന്നു.

(d)സ്റ്റെതസ്കോപ്പ് 

1-ാം വർഷ എം.ബി.ബി.എസ്., ബി.ഡി.എസ്. വിദ്യാർത്ഥികൾക്ക് സ്റ്റെതസ്കോപ്പ് വാങ്ങുന്നതിന് ധനസഹായമായി 5,800/- രൂപ നൽകുന്നു. അപേക്ഷ സ്ഥാപനമേധാവി മുഖേന അതത് ജില്ലാ പട്ടികജാതി വികസന ഓഫീസിൽ സമർപ്പിക്കേണ്ടതാണ്.

(e)ലാപ്ടോപ്പ് 

പട്ടികജാതി വികസന വകുപ്പിൽ നിന്നും വിദ്യാഭ്യാസാനുകൂല്യം നൽകുന്ന ചുവടെ ചേർത്തിട്ടുള്ള കോഴ്‌സുകളിൽ പഠിക്കുന്ന പട്ടികജാതി വിഭാഗം വിദ്യാർത്ഥികൾക്കാണ് ലാപ്ടോപ്പ് വാങ്ങുന്നതിനായി ധനസഹായം അനുവദിക്കുന്നത്.

• പോളിടെക്നിക് - ഡിപ്ലോമ ഇൻ കമ്പ്യൂട്ടർ സയൻസ്, ഡിപ്ലോമ ഇൻ കമ്പ്യൂട്ടർ എഞ്ചിനീയറിംഗ്, ഡിപ്ലോമ ഇൻ ഇൻഫർമേഷൻ ടെക്നോളജി, ഡിപ്ലോമ ഇൻ കമ്പ്യൂട്ടർ ഹാർഡ്‌വെയർ മെയിന്റനൻസ്, ഡിപ്ലോമ ഇൻ കമ്പ്യൂട്ടർ ആപ്ലിക്കേഷൻ, ഡിപ്ലോമ ഇൻ കമ്പ്യൂട്ടർ ഹാർഡ്‌വെയർ എഞ്ചിനീയറിംഗ്, ഡിപ്ലോമ ഇൻ കമ്പ്യൂട്ടർ ഹാർഡ്‌വെയർ & നെറ്റ്‌വർക്കിംഗ്, ഡിപ്ലോമ ഇൻ ടെക്സ്റ്റൈൽ ടെക്നോളജി.
• എം.ബി.എ, എം.സി.എ, എം.എസ്.ഡബ്ല്യു.
• എം.ബി.ബി.എസ്, ബി.ഡി.എസ്, ബി.എ.എം.എസ്, ബി.എച്ച്.എം.എസ്, ബി.വി.എസ്.സി. & എ.എച്ച്.
• എം.എസ്.സി (എല്ലാ വിഷയവും)
• പി.എച്ച്.ഡി / എം.ഫിൽ
• ബി.ടെക്, ബി.ആർക്ക്, എം.ടെക്
• എൽ.എൽ.ബി, എൽ.എൽ.എം
• ബി.കോം (കമ്പ്യൂട്ടർ ആപ്ലിക്കേഷൻ / വൊക്കേഷണൽ കമ്പ്യൂട്ടർ ആപ്ലിക്കേഷൻ / കമ്പ്യൂട്ടർ സയൻസ്)
• ബി.എസ്.സി (കമ്പ്യൂട്ടർ സയൻസ്), ബി.എസ്.സി. (ബയോടെക്നോളജി)
• ബി.എസ്.സി (ഫിഷറീസ്), ബി.എസ്.സി (ഐ.ടി), ബി.സി.എ
• കൊമേഴ്‌ഷ്യൽ പൈലറ്റ് ലൈസൻസ് (വിംഗ്സ് പദ്ധതി പ്രകാരം അഡ്മിഷൻ ആകുന്നവർക്ക്)
• ബി.എ. (ആനിമേഷൻ & ഗ്രാഫിക് ഡിസൈനിംഗ്), ബി.എ (മാസ് കമ്മ്യൂണിക്കേഷൻ), ബി.എ (ട്രാവൽ & ടൂറിസം മാനേജ്‌മെന്റ്), ബാച്ചിലർ ഓഫ് മൾട്ടിമീഡിയ കമ്മ്യൂണിക്കേഷൻ, ബാച്ചിലർ ഓഫ് ടൂറിസം സ്റ്റഡീസ്.
• ചാർട്ടേഡ് അക്കൗണ്ടന്റ് (ഇന്റർമീഡിയറ്റ് / ഫൈനൽ കോഴ്‌സ് പഠിക്കുന്നവർക്ക് ഇൻസ്റ്റിറ്റ്യൂട്ട് ഓഫ് ചാർട്ടേഡ് അക്കൗണ്ടന്റ്സ് ഓഫ് ഇന്ത്യയിൽ നിന്ന് ഇന്റർമീഡിയറ്റ് / ഫൈനൽ കോഴ്‌സ് പഠിക്കുന്നുവെന്ന സർട്ടിഫിക്കറ്റ് ഹാജരാക്കുന്ന മുറയ്ക്ക്), കമ്പനി സെക്രട്ടറി - (എക്‌സിക്യൂട്ടീവ് പ്രൊഫഷണൽ പ്രോഗ്രാം പഠിക്കുന്നവർക്ക് ഇൻസ്റ്റിറ്റ്യൂട്ട് ഓഫ് കമ്പനി സെക്രട്ടറി ഓഫ് ഇന്ത്യയിൽ നിന്നും എക്‌സിക്യൂട്ടീവ് പ്രൊഫഷണൽ പ്രോഗ്രാം പഠിക്കുന്നുവെന്ന സർട്ടിഫിക്കറ്റ് ഹാജരാക്കുന്ന മുറയ്ക്ക്).
• കോസ്റ്റ് ആൻഡ് വർക്ക്സ് അക്കൗണ്ടന്റ് - (ഇന്റർമീഡിയറ്റ് / ഫൈനൽ കോഴ്‌സ് പഠിക്കുന്നവർക്ക് ഇൻസ്റ്റിറ്റ്യൂട്ട് ഓഫ് കോസ്റ്റ് അക്കൗണ്ടന്റ്സ് ഓഫ് ഇന്ത്യയിൽ നിന്നും ഇന്റർമീഡിയറ്റ് / ഫൈനൽ കോഴ്‌സ് പഠിക്കുന്നുവെന്ന സർട്ടിഫിക്കറ്റ് ഹാജരാക്കുന്ന മുറയ്ക്ക്).
• ബി.ടെക് റോബോട്ടിക്‌സ് & ആർട്ടിഫിഷ്യൽ ഇന്റലിജൻസ്, ബി.ടെക് കമ്പ്യൂട്ടർ സയൻസ് & ഡിസൈൻ, എം.ടെക് ഇലക്ട്രിക്കൽ ഡ്രൈവ്സ് ആൻഡ് കൺട്രോൾ, എം.ടെക് സ്ട്രക്ചറൽ എഞ്ചിനീയറിംഗ്.

മാനദണ്ഡങ്ങൾ

• സർക്കാർ ഉത്തരവ് സ.ഉ(സാധാ)നം.190/2024/പ.ജാ.പ.വർഗ്ഗ.വി.വ തീയതി 16-03-2024 പ്രകാരം ധനസഹായം അനുവദിക്കുന്നു.   
• കോഴ്‌സിന്റെ ഒന്നാം അധ്യയന വർഷത്തിൽ പഠിക്കുന്ന പട്ടികജാതി വിദ്യാർത്ഥികൾക്ക് മാത്രമാണ് ലാപ്ടോപ്പ് വാങ്ങുന്നതിന് സ്‌കോളർഷിപ്പിന് അർഹത ഉണ്ടായിരിക്കുക.   
• AISHE CODE/UDISE CODE ഉള്ള ദേശീയ പ്രാധാന്യമുള്ള സ്ഥാപനങ്ങൾ (Institutions of National Importance)/സെൻട്രൽ/സ്റ്റേറ്റ്/യു.ജി.സി. അംഗീകാരമുള്ള കോളേജുകൾ, കേന്ദ്ര/സംസ്ഥാന സർക്കാർ അംഗീകാരമുള്ള ഡിപ്ലോമ കോഴ്‌സ് നടത്തുന്ന സ്ഥാപനങ്ങളിൽ (Diploma granting Institutions as recognised by State/Central Governments) അനുബന്ധമായി കൊടുത്തിട്ടുള്ള കോഴ്‌സുകളിൽ പഠിക്കുന്ന പട്ടികജാതി/പട്ടികവർഗ്ഗ വിദ്യാർത്ഥികൾക്ക് ലാപ്ടോപ്പ് വാങ്ങുന്നതിന് സ്‌കോളർഷിപ്പ് ലഭിക്കുന്നതാണ്. മെരിറ്റ്/റിസർവേഷനിൽ അഡ്മിഷൻ ലഭിക്കുന്നവരെ മാത്രമാണ് ലാപ്ടോപ്പ് വാങ്ങുന്നതിനുള്ള സ്‌കോളർഷിപ്പിന് പരിഗണിക്കേണ്ടത്.   
• പട്ടികജാതി വിദ്യാർത്ഥികൾ ഇ-ഗ്രാന്റ്സ് പോർട്ടൽ മുഖേന സ്‌കോളർഷിപ്പ് ലഭിക്കുന്നവരായിരിക്കണം.   
• വിദ്യാർത്ഥികൾക്ക് ആധാർ സീഡ് ചെയ്ത ബാങ്ക് അക്കൗണ്ട് ഉണ്ടായിരിക്കേണ്ടതാണ്.   
• സ്‌കോളർഷിപ്പ് തുക ഇ-ഗ്രാന്റ്സ് പോർട്ടൽ/ഇ-രൂപപ്പി (e-RUPI) മുഖേന അനുവദിക്കുന്നതാണ്.   
• രണ്ടാം വർഷം ലാറ്ററൽ എൻട്രി വഴി അഡ്മിഷൻ ലഭിച്ച എഞ്ചിനീയറിംഗ് വിദ്യാർത്ഥികൾക്ക് ലാപ്ടോപ്പ് വാങ്ങുന്നതിന് സ്‌കോളർഷിപ്പ് ലഭിക്കുന്നതാണ്.   
• കുടുംബ വാർഷിക വരുമാനം 5 ലക്ഷം വരെയുള്ളവർക്ക് സ്‌കോളർഷിപ്പ് ലഭിക്കുന്നതാണ്.   
• വിദ്യാർത്ഥിക്ക് ലാപ്ടോപ്പ് വാങ്ങുന്നതിന് ഒറ്റത്തവണ 30,000/- (മുപ്പതിനായിരം മാത്രം) രൂപ സ്‌കോളർഷിപ്പ് ലഭിക്കുന്നതാണ്.   
• തദ്ദേശ സ്വയംഭരണ വകുപ്പിൽ നിന്നോ / മറ്റ് ഗവ. വകുപ്പ് / ഏജൻസികളിൽ നിന്നോ ലാപ്ടോപ്പ് വാങ്ങുന്നതിന് ധനസഹായം ലഭിച്ചിട്ടുള്ളവർക്ക് ഈ സ്‌കോളർഷിപ്പ് ലഭിക്കുന്നതല്ല.   

(f)സംഗീതനൃത്ത ഉപകരണങ്ങൾ വാങ്ങുന്നതിന് ധനസഹായം അനുവദിക്കുന്ന പദ്ധതി

സംസ്ഥാനത്തെ വിവിധ അംഗീകൃത കോളേജുകളിൽ നൃത്ത സംഗീത വിഷയങ്ങളിൽ ബിരുദം ബിരുദാന്തര കോഴ്സുകളിൽ പഠിക്കുന്ന പട്ടികജാതി വിഭാഗത്തിൽപ്പെട്ട വിദ്യാർത്ഥികൾക്ക് സംഗീതനൃത്ത ഉപകരണങ്ങൾ വാങ്ങുന്നതിനായി ധനസഹായം നൽകുന്ന പദ്ധതി.

• ഈ പദ്ധതി പ്രകാരം അർഹരായ എല്ലാ വിദ്യാർത്ഥികൾക്കും അവർ പഠിക്കുന്ന വിഷയവുമായി ബന്ധപ്പെട്ട ഏറ്റവും പ്രധാനപ്പെട്ട ഏതെങ്കിലും ഒരു വാദ്യോപകരണം വാങ്ങുന്നതിന് ചുവടെ ചേർക്കും പ്രകാരം ധനസഹായം അനുവദിക്കുന്നതാണ്.

• നൃത്ത വിദ്യാർത്ഥികൾക്ക് സംഗീതനൃത്ത ഉപകരണങ്ങൾ വാങ്ങുന്നതിന് പരമാവധി 13,100/- രൂപ അനുവദിക്കുന്നു.
• അപേക്ഷ ബന്ധപ്പെട്ട ജില്ലാ പട്ടികജാതി വികസന ഓഫീസർക്ക് സമർപ്പിക്കണം.

(g) എഞ്ചിനീയറിംഗ്/ മെഡിക്കൽ കോഴ്‌സുകൾക്കുള്ള പ്രാരംഭ ചെലവ് തുക

എഞ്ചിനീയറിംഗ്/മെഡിക്കൽ കോഴ്‌സുകൾക്കുള്ള പ്രാരംഭ ചെലവ് തുക അനുവദിക്കുന്നു. നിരക്ക്:

മെഡിക്കൽ - 10,000/- എഞ്ചിനീയറിംഗ്- 5,000/-

അഡ്മിഷൻ നേടിയത് സംബന്ധിച്ച രേഖ, ജാതി, വരുമാന സർട്ടിഫിക്കറ്റുകൾ സഹിതം അപേക്ഷ സ്ഥാപനമേധാവി മുഖേന അതത് ജില്ലാ പട്ടികജാതി വികസന ആഫീസിൽ ലഭ്യമാക്കേണ്ടതാണ്. വരുമാന പരിധി 1,00,000/- രൂപ.